Nipi i Sadri Abazit me kompanitë e tij duket se ka “korrur” një sukses të madh për t’i mbushur mendjen qeverisë se bën një punë “të kulluar”. Në vetëm pak ditë, nëpërmjet kompanive të tij, ka marrë tendera në nivele të frikshme nga shumë institucione.
Radhën për ta “dendur” me para tashmë e ka vetë Ministri i Mbrojtjes Niko Peleshi. Ky i fundit me sa duket është mahnitur nga mënyra se si kompanitë e Arbër Abazit kanë pastruar lart e poshtë nëpër Shqipëri dhe ka vendosur ta shpallë fitues edhe për të ndërtuar hangarë helikopterësh.
Po, po, e dëgjuat mirë. Hangarët për helikopterët e ushtrisë do të ndërtohen nga nipi i Sadri Abazit. Bëhet fjalë për tenderin me numër reference REF-65657-04-11-2023 dhe me objekt “Ndërtim hangari për helikopterë, në Bazën Ajrore Farkë”.
Fondi limit është 407,623,670 lekë të reja pa TVSH ose rreth 4.9 miliardë lekë të vjetra. Nëse hulumtojmë dokumentat e këtij tenderi shikojmë mjaft “çudira”. Nga 8 kompani që kanë marrë pjesë në tender, 3 prej tyre nuk kanë ofruar fare ofertë ekonomike.
Ndërkohë nga 5 kompanitë e mbetura, 3 kanë ofruar vlera më të vogla se kompania e Arbër Abazit. Megjithatë kjo nuk e ka penguar Niko Peleshin që të shpallë fituese kompaninë ALKO-IMPEX General Construcion të Arbër Abazit bashkë me kompaninë tjetër AGRI CONSTRUCTION në pronësi të Petrit Patushit.
Këto kompani janë shpallur fituese për vlerën 384,361,462 lekë të reja pa TVSH ose rreth 4.6 miliardë lekë të vjetra me TVSH. Nëse kjo shifër krahasohet me fondin limit, rezulton të jetë sa 94% e tij. Të gjitha sa më sipër ngjallin dyshime të forta se fituesi mund të ketë qenë i paracaktuar që në fillim.
