Pas lajmit që bëri xhiron e rrjetit, në lidhje me makinën luksoze me të cilën lëviz së fundi kryeministri Edi Rama janë zbuluar detaje të reja. Para pak ditësh në një përgjigje zyrtare për mediat, qeveria njoftoi se automjeti luksoz me të cilin lëvizte Rama është marrë me qira nga Partia Socialiste prej një subjekti privat të regjistruar në emër të zonjës E. Hoxhallari.
"Faktor.al" ka zbuluar se biznesi ku makina amerikane GMC është marrë me qira është në emër të shtetases Edlira Hoxhallari e cila prej vitit 2016 operon duke tregtuar pjesë të vjetra të automjeteve, tregti të automjeteve të përdorura dhe së fundmi dhënien e automjeteve me qira. Biznesi në emër të zonjës Hoxhallari ndodhet në Maminas dhe xhiroja vjetore e këtij biznesi është modeste dhe fitimi i deklaruar është gjithashtu modest, duke mos i kaluar as 1 milionë lekë në vit. Nuk dihet se si biznesi i zonjës Hoxhallari ka mundur të japë me qira një automjet të tillë i cili kap vlerën e 500 mijë dollarëve.