Zgjedhjet në PD, Jemin Gjana tregon kur shpallet fituesi

Jemin Gjana, kryetari i Komisionit Zgjedhor në Partinë Demokratike, publikoi të dhënat e votimit deri më tani, ndërsa tha se deri nesër në mesditë pritet të nxirret rezultati se cili do jetë fituesi.

Më konkretisht, ai është shprehur se:

Një të dhënë operative tek 3-4 orët pas mbylljes së votimit. Do presim deri nga mesnata degët që janë afër, të presim materialet, degët që janë shumë larg, Tropoja, Saranda, Kolonja, e të tjera, do i presim t’i sjellin nga orët e para të mëngjesit. Porosia është që t’i shoqërojë kryetari i komisionit dhe cilido nga përfaqësuesit e kandidatëve. Nesër paradite shpallet fituesi. Orën nuk e jap dot.

Gjana tha gjithashtu se deri në orën 16:00 kanë votuar 44% e anëtarëve ndërsa shtoi se anëtarët të cilët nuk kanë pasur emrin në lista dhe kanë pasur kartën e anëtarësisë, e kanë pasur mundësinë që të votojnë. Ndër të tjera, ai tha se emri në lista është ndryshuar për shkak të përpunimit në sistemet e IT të emrave.

Kujtojmë se Partia Demokratike po zhvillon sot zgjedhjet për kreun e ri, të cilat kanë nisur në orën 08:00 të mëngjesit dhe pritet të mbyllen në 19:00.

Gjana është shprehur se:

Pjesëmarrja e votuesve në të gjithë vendin është 44%. Në përgjithësi janë lejuar ato që kanë kartën e anëtarësisë, pa i penguar. Nëse dikush nuk rezulton në listë emri por disponon kartën e anëtarësie mund të votojë. Janë pengesa, lëvizje të paqëllimshme, duke qenë të paqëllimshme kemi krijuar një hapësirë tjetër në lëvizje.

Në garë për të marrë kryesinë e Partisë Demokratike janë 4 emra.

1. Fatbardh Kadilli
2. Edith Harxhi
3. Agron Shehaj
4. Lulzim Basha