Rrëzimi i papritur në tokë i Kristian Eriksen në ndeshjen Danimarkë-Finlandë ka tronditur dhe shokuar mbarë botën dhe dashamirësit e futbollit. Eriksen pësoi atak kardiak dhe ra menjëherë në fushë. Fillimisht ishin futbollistët ata që i shkuan në ndihmë dhe më pas u thirr stafi mjekësor. Eriksen u transportua me urgjencë në spital dhe ndodhet në gjendje të stabilizuar shëndetësore. Ndërkohë teksa u luajt ndeshja tjetër e Europianit Rusi-Belgjikë, ishte Romelu Lukaku i cili shënimin e golit ia dedikoi Eriksenit. Gjithashtu një tjetër lojtar ka bërë të njëjtin gjest. Bëhet fjalë për mbrojtësin, Ashraf Hakimi i cili shënoi me kombëtaren e tij Marokun në miqësoren me Burkina Fason. Hakimi realizoi në minutën e 51-të të takimit dhe u drejtua drejt kamerave duke festuar me numrin 24, numër të cilin Eriksen e mban në fanellë tek skuadra e Interit.
