Dy ditë më parë Policia i sekuestroi pasuri me vlerë rreth 3 milionë euro biznesmenit Gëzim Sallaku, vëllait të tij Saimir Sallakut dhe një personi tjetër, me të cilin dy vëllezërit kanë lidhje shoqërore, i identifikuar si Rabi Kurti. Sekuestrimi i pronave dhe pasurive ka ardhur pas dyshimeve në lidhje me veprimtari kriminale në fushën e pastrimit të parave. Në sekuestro u vunë gjithashtu edhe dy apartamente në Durrës, në emër të shtetasit Gëzim Sallaku; 20.600 m2 sipërfaqe toke arë, në Durrës, po në emër të shtetasit Gëzim Sallaku si dhe 1000 m2 sipërfaqe toke truall, mbi të cilën janë ndërtuar 2 banesa me sipërfaqe 140 m2 secila, në Durrës. Gjithashtu janë sekuestruar edhe 13 automjete të markave të ndryshme.
Ndërkohë të tjera detaje janë zbardhur në lidhje me këtë aksion. Mësohet se një kompani e regjistruar në Panama ka transferuar gjysmë milionë euro në llogaritë e biznesmenit Gëzim Sallaku. Prokuroria e Durrësit bën me dije se transfertat bankare ndaj Sallakut u urdhëruan nga kompania “CAPRIASCA TRADING SA” nëpërmjet një banke në Zvicër. Rezulton se pronarët e kompanisë panameze (Ezquiel Ruiz Rodriguez dhe Lulian De Muschett), nga e cila Sallaku mori gjysmë milionë euro janë persona të përfshirë në skandale të korrupsionit në Spanjë. Ndërsa nga ana tjetër titullarja e llogarisë bankare prej nga u trasferuan paratë ishte e moshuara Anna Maria Poiatti dhe me këto para do të blihej një vilë në zonën e plazhit në Durrës.
Megjithatë ajo ka mohuar të ketë lidhur kontratë me Gëzim Sallakun për blerjen e ndonjë prone. Sa i përket kompanisë në Panama, Poiatti shprehet se ka depozituar të ardhura përgjatë 40 viteve. Por një prokuror Italian Sandro Raimondi, ka ngritur dyshimet se paratë e trasferuara nga llogaria e Pioattit janë përdorur nga biznesmeni shqiptar për të blerë ‘mall’. Me paratë e kompanisë panameze dhe të tjera, vëllezërit Sallaku kanë ngritur vilat dhe kanë blerë toka me qëllim ngritjen e bizneseve të ndryshme në Shqipëri. Për këtë arysy prokurori Afrim Shehu ka arritur në prfundimin se pasuritë e vëllezërve Sallaku dhe mikut të tyre kanë ardhur si rezultat i veprimtarisë kriminale.
