Gjykata e Fierit ka dhënë masën e sigurisë 'arrest me burg' për autorin e dyshuar të vrasjes së Shkëlzen Kastratit, Albert Zaja, por këtë herë për mbajtje pa leje të armëve luftarake. Kjo është hera e dytë që Zaja del para togave të zeza pasi më herët i është komunikuar masa e 'arrestit me burg' për vrasje me paramendim të kryer në bashkëpunim. Zaja u arrestua para pak javëshnë kuadër të një operacion policor të ekzekutuar në Nikël të Fushë-Krujës. Dyshohet se gjatë arrestimit ka patur edhe të shtëna. Zajës iu gjet një pistoletë e llojit “Gloc”, e mbushur me fishek ne gojë. RENEA ka ushtruar kontrolle në disa banesa në zonë, ku edhe dyshohej se fshiheshin autorët e shpallur në kërkim për 'eliminimin' e Shkëlzen Kastratit. Pasi policia zbarkoi në zonë, Zaja e kuptoi se ishte i rrethuar dhe tentoi të largohej, por pa sukses.
Pas arrestimit Albert Zaja është shoqëruar nën masa të rrepta sigurie në Drejtorinë e Policisë së Tiranës. Në lidhje me vrasjen e Kastratit vijojnë të jenë në kërkim Elson Xheçuka, Roland Cara dhe Elmir Tufa. Kujtojmë se Shkëlzen Kastrati u vra më 1 shkurt brenda makinës së tij.
