Një ngjarje e rëndë u regjistrua ditën e sotme në Dibër, ku një 50-vjeçar u vra me armë zjarri nga dy vëllezër pas një konflikti për pronën. Viktimë mbeti Xhetan Konesha i cili ka ndërruar jetë në spital pasi nuk arriti t'i mbijetonte plagëve të marra. Në lidhje me këtë ngjarje policia ka arrestuar njërin prej vëllezërve Mera, ndërsa vëllai tjetër Altin Mera 42-vjeç vijon të mbetet në kërkim. Familjarët e familjes Konesha kanë treguar se prej kohësh dy familjet ishin në konflikt mes tyre, ndërsa para pak kohësh Konesha ka dhunuar Altin Merën në lokalin e fshatit.
Por konflikti i tyre që përfundoi me vrasjen e Koneshës e kishte zanafillën te një tubacion ujë që ky i fundit e kishte rregulluar një vit më parë. Sipas "Panorama", ai montoi një tubacion nga burimi deri në shtëpi, por kjo e kishte shqetësuar familjen Mera, e cila pretendonte se burimi nuk ishte pronë e Koneshës. Xhetan Konesha ishte kthyer disa ditë më parë nga Greqia. Familjarët i kishin thënë se tubacionin e ujit e kishin dëmtuar vëllezërit Mera. Kjo e kishte shqetësuar Xhetanin. Ai kishte dërguar të afërm në familjen Mera dhe u kërkonte ta rikthenin tubin e ujit në gjendjen e mëparshme, ndryshe do të kishin probleme. Ndërsa dje në mëngjes kur Konesha kur po lëvizte nga banesa e tij drejt fshatit u përball me vëllezërit Mera.
Në fillim ata kanë debatuar e më pas janë përplasur dhe fizikisht, por sherri mes tyre ka agravuar dhe njëri nga vëllezërit ka qëlluar disa herë me automatik mbi Xhetanin. Pas krimit, dy vëllezërit janë larguar nga vendi i ngjarjes, ndërkohë banorët e Luznisë pasi kanë dëgjuar krismat kanë mbërritur në vendin e ngjarjes. Ata kanë arritur ta dërgojnë në spital por Konesha nuk ka arritur të mbijetojë për shkak të plagëve të marra. Pas arrestimit të njërit prej autorëve policia ka marrë në mbrojtje dy familjet e përfshira në konflikt të mëhershëm për ujin dhe tokën.
