Një 71-vjeçar ditën e sotme vuri në lëvizje forcat RENEA dhe gjithë policinë e shtetit. Ai qëlloi me armë drejt policisë pas një konflikti që pati me ish-bashkëshorten dhe vajzën, ku la të plagosur 2 kalimtarë. Lefter Zhidru u ngujua në shtëpi, me armën gati dhe pas 5 orësh negociatash, autoritet vendosën t’i hyjnë në shtëpi me forcë dhe ta ekzekutojnë. Gjatë ngjarjes, në shtëpi nuk ishte ngujuar vetëm i moshuari por edhe banorët e pallatit. Ata kanë dalë pas 5 orësh të ngujuar nga pallati ku banojnë, pas këshillave të policisë për të mos lëvizur.
Në panik të plotë, shumë prej tyre kanë nxituar të dalin nga pallati menjëherë pas përfundimit të operacionit policor që përfundoi me ekzekutimin e 71 vjeçarit. Ata kanë shprehur frikë për ngjarjen, por pa dhënë detaje të shumta mbi viktimën. 71-vjeçari me origjinë nga Xarra e Sarandës jetonte në zonën ‘Kthesa e Sarës’ në Elbasan. Prej 5 vitesh ai kishte migruar nga Saranda në Elbasan dhe në lagjen e tij njihej si tip problematik. Zhidru ishte ndarë nga bashkëshortja e tij me të cilën ka dhe një vajzë 14-vjeçare, mirëpo jetonin në të njëjtën banesë. Kjo është gruaja e tij e tretë, ndërsa me martesat e mëparshme ka dy fëmijë.
