Seria A po i rikthehet normalitetit. Federata e Futbollit në Itali po shpreson dhe po punon që të rikthejë tifozët në stadium. Momentalisht, lejohen vetëm 1000 tifozë, por ky numër pritet të shtohet. Madje pas një mbledhjeje të parë ditën e djeshme, mes ministrit të Sporteve, Vinçenco Spadafora dhe qeverisë, ka ardhur një “OK” i parë për mundësinë e mbushjes së 1/3-ës së kapaciteteve të stadiumeve me tifozë.
Ndërsa ditën e sotme pritet që të dalë një protokoll bazë për t’u zbatuar nga tifozët, thjesht ideja për të parë për shembull të dielën në mbrëmje, një Roma-Juve me 20- 25 mijë tifozë ekzalton sportdashësit. Gjithsesi, diçka më konkrete pritet të mësohet ditën e sotme, pasi ministri Spadafora dhe qeveria do të bëjnë vlerësimin e tyre të parë, lidhur me protokollin, për mundësinë e rihapjes më të plotë të stadiumeve.