Më 15 shtator të këtij viti, një makinë e cila shpërtheu në levizje tronditi gjithë Tiranën. Në makinë ndodhej një bomë, të cilën dyshohet se e kishin vënë për tu hakmarrë ndaj Preng Gjinit. Gjini fatmirësisht shpëtoi, por me plagë të shumta. Atentati që iu bë 50-vjeçarit është duke u hetuar dhe detaje të reja zbardhen dita-ditës. Burime bëjnë me dije se prokuroria ka një të dyshuar. Ky konkluzion vjen pas mbledhjes së provave dhe pamjeve të kamerave të sigurisë. Mësohet se i dyshuari shfaqet në kamera duke u larguar me vrap në momentin e shpërthimit. Personi në fjalë dyshohet se është i afërt me familjen Reçi. Sipas pamjeve të kamerave të sigurisë, autori rezulton i veshur me bluzë të zezë, xhinse të errëta dhe kapele. Ndërkohë pikërisht për këtë ngjarjee sot u mbajt një takim Polici-Prokurori mes drejtuesve të dy institucioneve. Dyshohet se atentati ndaj Gjinit erdhi për shkak të prishjes së pazareve të drogës mes familjeve Reçi e Gjini.
