Puna gjatë pandemisë ka qenë mjaft e vështirë për të gjithë mjekët, të cilët herë pas here kanë kërkuar që t'i sigurohen kushte të përshtatshme dhe të vlerësoen në aspektin financiar. Për këtë mjekët e QSUT kanë lajmëruar se do zhvillojnë një proteste ditën e nesërme përpara spitalit nr.1 të kompleksit spitalor. Në bazë të njoftimit nga Sindikata e Punonjësve të Shërbimit Shëndetësor, protesta do të mbahet rreth orës 10:00 dhe do të zgjasë një orë. Mjekët kërkojnë plotësimin e 4 pikave prej institucioneve shtetërore, të cilat lidhen me kushtet ku punojnë si dhe me pagesat e tyre.
Ndërkohë si pasojë e ligjit në fuqi që ndalon tubimet, policia e ka refuzuar kërkesën e mjekëve.
Kërkesat e plota:
1. Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm.
2. Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën dhe pas fatkeqësive të mundshme në këtë luftë.
3. Rritje e vlerësueshme e trajtimit financiar të personelit shëndetësor.
4. Personelit shëndetësor të çdo niveli t'i sigurohen të gjitha kushtet në punë për parandalimin e infeksionit sipas të gjithave standarteve kombëtare dhe ndërkombëtare.
