Breshëritë me armë zjarri që prishën qetësinë e Selenicës në Vlorë gjatë muajit maj ishin vazhdimi i një hasmërie mes familjeve Llanaj dhe Xhaferaj. Nga atentati ku u zbrazën të paktën 30 plumba mbeti i plagosur Jetnor Xhaferaj. Që nga ai moment, 50-vjeçari ndodhet në Spitalin i Traumës jashtë rrezikut për jetën, ku ka marrë mjekim pas plagëve nga atentati i dytë. I mbijetuari i atentatit në një bisedë që pati me gazetaren Anila Hoxha, kërkoi që të mos largohet nga spitli pasi i rrezikohet sërish jeta.
Rrëfimi i tij nga Spitali i Traumës:
Gazetarja: Përse nuk ikën nga spitali?
Jetnor Xhaferaj: Dua vetëmbrojtje, s’kam ku vete, më vrasin.
Gazetarja: Ka ardhur automjeti i policisë.
Jetnor Xhaferaj: Policia nuk më merr në mbrojtje. Më kanë bërë dy atentate. Kam kërkuar mbrojtje nga shteti, për jetën time.
Gazetarja: Kur ka ndodhur atentati?
Jetnor Xhaferaj: Atentati ka ndodhur në datën 16 maj. I fundit ndodhi në datën 1 gusht.
Gazetarja: Kush të qëlloi i njohe?
Jetnor Xhaferaj: Jo. Më qëlluan me breshëri automatike. Shtëpia është bërë shosh. Kjo është plagosja e parë dhe kjo është e dyta.
Gazetarja: Nga kush ke frikë?
Jetnor Xhaferaj: Jam me probleme. Hasmërinë e di shtetit e di çdo njeri.
Gazetarja: Përse nuk ikën?
Jetnor Xhaferaj: Nuk kam ku iki, kërkoj mbrojtje. Të më mbroj shteti. Kam frikë nga hasmëria.
Gazetarja: Do vazhdosh të qëndrosh në spital?
Jetnor Xhaferaj: Po do vazhdoj të qëndroj këtu.
Konflikti ndërmjet fiseve Llanaj dhe Xhaferaj, rezulton të ketë nisur në vitin 1998, kur u vra me armë në Selenicë të Vlorës Gjysho Xhaferaj. Për vrasjen e tij u akuzua nga prokuroria Baftjar Llanaj. Nuk kaloi shumë dhe në qershor 2011 u ekzekutua në Vlorë Baftjar Llanaj. Ngjarja e rëndë ndodhi më 14 qershor 2011 rreth orës 18:00 në rrugën që lidh qytezën e Selenicës me Vlorën, në vendin e quajtur “Bishti i Malit”. Saga e hakmarrjes duket se do të vazhdojë me daljen nga spitali të Jetnor Xhaferaj.
