Dje raportuam se 52-vjeçari Tonin Tuci u vetëvar në ambientet e paraburgimit të Drejtorisë Vendore të Policisë Durrës ndërsa SHÇBA nisi hetimet ndaj dy punonjësve të policisë.
Ngjarja ka ngjallur dyshime në familjen e të ndjerit i cili u përcoll sot për në banesën e fundit. Motrat e viktimës apelojnë për drejtësi pasi kanë bindjen se vëllai i tyre nuk është vetëvarur me lidhësen e tutave.
Bashkëshortja e tij ka dhënë detaje lidhur me përshkallëzimin e ngjarjes prej momentit të debatit në familje deri në ndëryrjen e policisë për të shoqëruar të shoqin në polici dhe më pas mënyrën si u njoftua se ai kishte ndërruar jetë.
Nga puna erdha në shtëpi. Ishte i acaruar nën efektin e alkoolit dhe për të eliminuar një sherr të mundshëm në shtëpi njoftova policinë se nuk po e qetësoja dot. Kur shkova në polici, shefi që ishte në shërbim më thotë të marr urdhër mbrojtjeje, por i thashë jo se nuk dua ta hedh burrin në rrugë. I kërkova që vetëm ta mbajë në polici e të qetësohet për disa orë e të vijë në shtëpi. Dhe pse më kërkoi disa herë nuk pranova. Lamë të dhënat tona, numër telefoni dhe u larguam. Në momentin që jam larguar, rreth orës 6 të pasdites, burri im ishte ulur në stolat e hyrjes kryesore të policisë. E lashë në dorë të policisë. Unë e çova për ta mbrojt, jo për ta dhunuar se e keqja do kishte ndodh në shtëpi.
Familja Tuci me origjinë nga Fani i Mirditës, prej shumë vitesh jetonte me qira në Durrës. Kryefamiljari Tonin Tuci ishte i papunë dhe kishte varësi nga alkooli çfarë kishte tensionuar përplasjet në familje.
Gruaja e tij Liza e kishte denoncuar edhe para një viti për dhunë në familje babain e dy fëmijëve të saj ndërsa tregon se kur ishte duke dalë nga komisariati me djalin e saj e pa të shoqin ulur në stol në oborrin e komisariatit.
Unë e doja burrin tim, pavarësisht se ai pinte vazhdimisht. Në orën 11.00 të natës, ndërsa unë prisja të vinte burri në shtëpi më morën në telefon e më kërkuan të dal e të jap një deklaratë të dytë. Pse? Jo i them. Nuk dal në rrugë, eja në shtëpi. Përpara kësaj e pyes: Si është Tonini? Mirë më tha, po kur vjen në shtëpi më thotë: Të rrojnë çunat se Tonini ka vdek. Unë s’mund ta besoja. E vërteta është kjo, si e kamuflojnë ngjarjen është punë e tyre. E ka drejtësia në dorë. Ai donte alkoolin, po jo të vriste veten.
Motra e të ndjerit hedh dyshime për humbjen e parakohshme të vëllait:
Ai nuk ka pas asnjë arsye me var veten. Na ka ardh bombë. Ai ka pas pi, po ka qenë shumë i dashur, i respektueshëm. Nuk e di si ka ndodh ngjarja tamam. Si motër kam qejf që të dalë e drejta në pah, sepse 52 vjeç. Asnjëherë s’ka tentu të vrasë veten. Pse e vrau në qeli?! Ju, si polici e shtetit pse nuk e mbrojtët? Ajo e çoi për ta mbrojtur, për të mos krijuar sherr në familje te Policia e Shtetit dhe kjo e vrau. Vëllai im nuk ka vrarë veten. Vëllain tim e kanë vrarë. E kanë godit. Pse s’e ruajte, po e le të vriste veten me një fije llastik?!