Një ngjarje e rëndë ndodhi dy ditë më parë në fshatin Babunjë të Divjakës, ku 58-vjeçari Hekuran Rrasa vrau me armë gjahu bashkëshorten e tij Fëllënxa dhe më pas veten. Sipas deklaratave të të afërmve të tyre, çifti jetonte në vështirësi ekonomike dhe kishin konflikte për punët e shtëpisë. Trupat e pajetë u gjetën nga djali i vetëm i tyre, Leonardi, i cili u shpreh mjaft i tronditur. Në një intervistë për News 24, ai rrëfeu ngjarjen e rëndë, ku ndër të tjera u shpreh se nëna e tij kishte ikur një javë në shtëpinë e prindërve të saj, pas konflikteve që kishte patur me të shoqin. Ajo ishte kthyer në shtëpi vetëm një ditë para ngjarjes. Leonardi shtoi se babai i kishte premtuar se nuk do ta ngacmonte më nënën e tij dhe se nuk do të ziheshin.
Djali u shpreh:
Ajo pati konflikte për punët e shtëpisë. Shkoi 1 javë te prindërit. Unë shkova ta merrja, me premtimin se s’do të bënin llafe më. E solla të premten, atë ditë shtynë mirë. M’u bë qejfi, se ishin mirë. Të nesërmen u bë kjo tragjedi e madhe. Ai më tha: “s’do bëj gjë më, ik pa frikë”.Më pati premtuar që s’do më linte vetëm, po unë ku do rri më. Në orën 16:00 ika nga shtëpia. Dal nga lokali si gjithë të tjerët. Më marrin në telefon dhe më thonë hajde te shtëpia. Ngjarja ndodhi në dhomën e tyre të gjumit. Kur e pashë tragjedinë, mora në telefon Policinë e Shtetit më ndihmoni. Për armën s’kam pasur dijeni. Nuk kam vënë re asgjë. Se do rrija aty. E merrja mamanë dhe e çoja te babai i vet. Babai më tha premtimin se s’do i bëjë gjë. S’do të lë vetëm ty. Kështu më tha. Ai e bëri këtë tani.