Gratë afgane po protestojnë për të drejtat e tyre pas ligjeve kufizuese të vendosura së fundmi nga talebanët. Disa gra afgane kanë mbajtur këtë të dielë protesta në Kabul, për njohjen e të drejtave të tyre, duke kërkuar që t’u lejohet të shkollohen dhe të punojnë.
Sipas mediave të huaja, protestueset u mblodhën para ish-Ministrisë për Çështjet e Grave, duke mbajtur pankarta ku shkruhej “Një shoqëri në të cilën gratë nuk janë aktive, është shoqëri e vdekur”. Protesta zgjati rreth 10 minuta dhe gratë u larguan menjëherë pas një përballje verbale me një person të paidentifikuar.
Vlen të thuhet se gjatë ditëve të fundit, talebanët kanë lëshuar një sërë kufizimesh për gratë dhe vajzat duke i ndaluar ato të shkojnë në shkollë dhe në punë. Kujtojmë se gratë afgane kanë mbajtur disa protesta, që prej marrjes së pushtetit nga Talebanët. Ato kanë hasur dhunë fizike e verbale, teksa kërkojnë të drejtat e tyre.