Gjykata e Tiranës ka lënë në burg 4 shpërndarësit e kokainës të cilët u arrestuan pas një operacioni anti-drogë të zhvilluar në zonën e “Varrit të Bamit”. Ndërkohë, policia ka lënë nën masën e arrestit të shtëpisë, drejtuesin e mjetit tip "Benz" Gazmir Cani, i cili ia mbathi gjatë aksionit, duke rrezikuar dhe jetën e punonjësve të policisë.
Nga hetimet, dyshohet se këta persona përdornin biznesin për sjelljen e lëndës narkotike dhe më tej ndarjen e saj në doza më të vogla dhe shpërndarjen në disa pika të kryeqytetit. Raportohet se ky biznes ishte në pronësi të shtetasit me iniciale G.K., ndërsa sasia e lëndës narkotike sillej nga dy persona me motor brenda kutive të picave.
Në momentin që efektivët e antidrogës ndërhynë 4 të hetuarit u larguan me shpejtësi, ndërsa lënda narkotike u gjet në brendësi të dy kutive të picave, e fshehur poshtë një makine. Vlen të theksohet se ndërhyrja e policisë u bë virale në rrjetet sociale, kjo për shkak se efektivët e policisë gjatë operacionit nuk ndaluan dot një makinë me xhama të zinj që ishte pranë vendit të ngjarjes, dhe për këtë arsye për mos të “dalë pa gjë” arrestuan një gazetar që po filmonte “superaksionin”.
Për këtë episod ka nisur edhe një hetim nga ana e SHÇBA dhe Prokurorisë, ku do të shihen veprimet e efektivëve të policisë. Sakaq në operacionin e quajtur “Xhamlliku” u sekuestruan 1 kg dhe 128 gr lëndë narkotike kokainë, 3 automjete dhe 7 aparate celulare.