Prej tre ditësh në Fier vijon beteja me flakët, teksa i gjithë qyteti është mbuluar nga tymi. Ndërkohë pasditen e sotme kryebashkiaku Armando Subashi ka shkuar të shohë nga afër punën për shuarjen e flakëve, ku ndër të tjera dha edhe ca këshilla. “Vetëm hidhi dhé. Hidhi dhé lart dhe kaq. Lëre ta tamposë dheu”– është dëgjuar të thotë Subashi. Shkak për zjarrin që përfshiu fushën e mbetjeve në Fier dyshohet se janë bërë temperaturat e larta. Ndërkohë dhjetë kamionë kanë shkuar pranë fushës për të hedhur dhe me qëllim që vatrat e zjarrit të mos riaktivizohen. Mbetjet e Fierit prej kohësh duhej të menaxhoheshin dhe digjeshin në inceneratorin e këtij qyteti, i cili duhej të kishte përfunduar së ndërtuari në prill të këtij viti.
Ndërtimi i inceneratorit është realizuar më anë të një kontrate partneriteti publik privat, e cila i ka kushtuar taksapaguesve 28 milionë euro.