Gjatë 48 orëve të fundit qyteti i Fierit është pushtuar nga re të pazakonta tymi për shkak të djegies së mbetjeve. Siç shihet edhe në pamjet e mëposhtme, tymi tashmë ka mbërthyer qytetin dhe askush nuk po reagon për zgjidhjen e situatës. Tymi që ka mbuluar Fierin prej ditësh ka krijuar një situatë të padurueshme në qytet. Mbetjet e Fierit prej kohësh duhej të menaxhoheshin dhe digjeshin në inceneratorin e këtij qyteti, i cili duhej të kishte përfunduar së ndërtuari në prill të këtij viti. Ndërtimi i inceneratorit është realizuar më anë të një kontrate partneriteti publik privat, e cila i ka kushtuar taksapaguesve 28 milionë euro.
“Po mbytemi, jemi në lagjen "1 Maj", në katin e pestë, e nuk i mbyllim dot dyert se është vapë e madhe, po thithim ajër toksik”- tha një banor që jeton rreth 2 kilometra nga fusha e mbetjeve që po digjet.
