Situata e zjarreve në kodrat e gadishullit të Karaburunit në Vlorë, vazhdon prej tre ditësh. Era e fortë ka bërë që flakët të përhapen me shpejtësi duke rindezur dhe vatra të cilat ishin shuar gjatë mëngjesit. Ndërkohë, raportohet se forcat zjarrfikëse kanë ndërprerë punën për momentin pasi është e vështirë për të ndërhyrë në këto kushte.
Problematike paraqitet situata edhe në Tragjas ku po punohet aktualisht, ndërsa harta e hapësirës së përfshirë nga flakët është zgjeruar. Tre vatra aktive masive raportohen edhe në Selenicë, në terrene të thella dhe të vështira, ku thuhet se mbi 200 ha tokë kullota dhe pyje janë djegur.
Aktualisht është e pamundur ndërhyrja nga ajri, pasi helikopterët e Ministrisë së Mbrojtjes janë në remont, ndërsa aksioni i zjarrfikseve do të rinisë në mbrëmje dhe gjatë natës.
