I shpëtoi jetën në momentin kritik, Simon Kjaer prek me postimin për Eriksen

Simon Kjaer ishte heroi që i shpëtoi jetën Eriksen, në momentin që ky i fundit pësoi atak kardiak në fushë në ndeshejn Danimarkë- Finlandë. Menjëherë sapo Eriksen ra përtokë, Kjaer shkoi me shpejtësi për t’i dhënë ndihmën e parë. Kjaer tregoi se ishte një lider i vërtetë i skuadrës pasi në momentet më kritike të saj arriti të ruante qetësinë, të ngushëllonte gruan e Eriksenit dhe të inkurajonte ekipin për të qëndruar të fortë. Ditën e sotme Danimarka do të ketë përballë Belgjikën dhe pak para ndeshjes, Kjaer i ka kushtuar një dedikim në Instagram shokut të tij Eriksen, ku ndër të tjera shprehet se gjëja më e rëndësishme është që Christian të ndihet mirë dhe ekipi të jetë i bashkuar.

Postimi i plotë i Kjaer:

Këto ishin ditë të veçanta, ku futbolli nuk ishte gjëja më e rëndësishme. Ishte një tronditje që do të jetë pjesë e imja dhe e jona përgjithmonë. Gjëja më e rëndësishne është që Christian të ndihet mirë. Jam krenar për mënyrën se si vepruam si një ekip dhe si kemi qenë të bashkuar në atë kohë të vështirë. Jm i prekur dhe thellësisht mirënjohës për mbështetjen. Sot ne do të shkojmë në fushë kundër Belgjikës me Christian në zemrat tona dhe në mendimet tona dhe kjo do të lejojë që ne do të përqendrohemi në ndeshje. Ne do të luajmë për Christian dhe si gjithmonë për të gjithë Danimarkën. Ky është motivi më i madh që mund të kemi. Si gjithmonë: ne do të bëjmë më të mirën!