Një ditë pas mbytjes së 44-vjeçarit nga Kosova në Velipojë, dhjetëra pushues kanë protestuar në plazh.
Sipas protestuesve të cilët shumica ishin kosovarë, në rastin e djeshëm Urgjenca është vonuar mbi një orë.
"Për ata jemi këtu për të dhënë një mesazh. Sa herë vijmë këtu kemi humbje të njerëzve. Pushteti e ka këtë detyrë. Po bëjmë apel, më tepër ne po e mbajmë shtetin se ata ne. Mos na bëni më të na shkojnë njerëzit. Ne më këtu nuk vijmë nëse nuk marrin masa”, tha një protestues.
“Më ka ardhur shumë keq që ka shkuar për kujdes të mjekëve. Sepse Emergjenca është vonuar shumë. Ai ka pasur infarkt por mund të shpëtonte. Me sa di është vonuar më shumë se një orë. Shumë larg më duket për të ardhur Emergjenca, tha një pushuese tjetër nga Kosova.
Të zhgënjyer dhe të revoltuar, ata kanë kërkuar që në plazhe të ketë roje bregdetare, ose përndryshe do ta braktisin këtë plazh.
“Jam nga Gjakova dhe vij në këtë plazh që prej 20 vitesh, 2 herë në vit. Ne kemi vënë re shumë gjëra negative. Pastërtia mungon. Po ashtu i bëj lutje shteti shqiptar që të vendosin mbikqyrsa, roje bregdetare që t’i vijnë në ndihmë qytetarëve. Çdo vit që kam ardhur këtu të paktën 4 deri në 5 persona vdesin sepse nuk ka as roje bregdetare. Dje humbi jetën 44 vjeçari nga Fushë Kosova. Edhe para disa ditësh një grua rrezikoi të humbte jetën”, shprehet një pushues nga Gjakova.
Ndërkohë nga qendra shëndetësore thanë se kjo qendër do të hapet që nga kjo e dielë, përpara afatit të caktuar nga Ministria e Shëndetësisë, që është 15 qershori."Me rastin që ndodhi dje qendra shëndetësore do të jetë e hapur tani në sezonin turistik. Do të jetë ambulanca 24 orë si çdo vit, të gjitha medikamentet qe ka qendra, stafi komplet do të jetë në gadishmëri. Kërkesa e madhe e pushuesve na bëri që ta hapim qendrën dy dit përpara," tha Vjollca Vocaj, infermiere në qendrën shëndetësore Velipojë.
