Tenderi i ushqimeve për rezervat e shtetit me vlerë 1.5 Milionë Euro i dhënë kompanisë së kompjuterave nga ministria e Mbrojtjes gjatë kohës kur në krye të saj ishte Olta Xhaçka, përfundoi në SPAK, pas një kallëzimi nga PD. Tenderi u bë në kushte emergjence gjatë kohës së pandemisë dhe iu dha kompanisë Eurovia, e cila 6 ditë përpara hapjes së garës kompania shtoi në objektin e aktiviteteve të saj tregtimin e produkteve ushqimore. Në lidhje me këtë çështje, Gjykata ka shpallur moskompetencën.
Të pandehur janë marrë 3 zyrtarë të ministrisë së Mbrojtjes, Ylli Imeri, Dafina Keca dhe Andrea Dapaj, anëtarë të Komisionit të Vlerësimit të Ofertave me akuzën për shkelje të barazisë në tendera. Për shpërdorim detyre akuzohet Sokol Zaimi, me detyrë Drejtor (i komanduar), i Drejtorisë së Përgjithshme e Rezervave Materiale të Shtetit. Ai për shkak të mosveprimit, që ka rezultuar në përllogaritjen e fondit limit në një vlerë më të madhe. Olta Xhaçka është marrë në pyetje gjatë hetimeve, por rezulton se ndaj saj nuk janë gjetur prova implikuese.
