Një ngjarje e rëndë tronditi Elbasanin dhe gjithë opinionin publik mesditën e sotme. Një 58-vjeçar i identifikuar si shtetasi Koço Bozo 'eliminoi' bashkëshorten e tij 54-vjeçare Liljana Bozo, me të cilën ishte në proces divorci. Ngjarja ndodhi pranë godinës së Gjykatës së Elbasanit në sy të vetë djalit të çiftit. Autori 58-vjeçar e ka ndjekur nga pas të shoqen dhe e ka qëlluar me breshëri plumbash pas shpine duke i marrë jetën. Djali i tyre ka parë gjithë skenën dhe ka ndërhyrë për t'i marrë armën të atit, por nuk ia ka dalë dot të mbronte nënën e tij. Autori u arrestua nga policia dhe mësohet se para efektivëve ka deklaruar se ishte xheloz dhe se i kishte kërkuar bashkëshortes më përpara që të mos shkonte në gjykatë për të kërkuar urdhër mbrojtjeje për dhunë në familje.
Gjithashtu bëhet me dije se ai e kishte paralajmëruar gruan e tij se nuk do ta linte të ndahej prej tij.“I pata thënë që nuk ke për t’u ndarë prej meje. Donte të më fuste në burg” – mësohet të ketë thënë ndër të tjera 58-vjeçari.