Pesë roje bregdetare u arrestuan ditën e sotme nga policia e Vlorës pasi akuzohen për “Shpërdorim Detyre” e kryer në bashkëpunim. Sipas asaj që bëri me dije policia, këta persona kanë ndihmuar drejtuesin e një gomoneje të kapur në 8 janar, të largohej. Në gomone u shpëtuan 55 sirianë të cilët ishin nisur drejt Italisë. Të arrestuarit janë B. B., 38 vjeç, banues në Vlorë, R. Ç., 54 vjeç, banues në Vlorë, B. M., 26 vjeç, banues në Vlorë, S. B., 23 vjeç, banues në Vlorë, A. A., 34 vjeç, banues në Vlorë.
Ndërkohë detaje të reja janë zbardhur në lidhje me ngjarjen. Mësohet se efektivë të Ushtrisë Shqiptare, kanë pajisur me jelekë shpëtimi trafikantët të cilët tentuan të trafikonin në rrugë detare nga Shqipëria drejt italisë, 55 klandestinë sirianë, iranianë dhe egjiptianë. Dy trafikantëve nga Vlora u janë dhënë jelekë shpëtimi nga ekuipazhi i anijes ushtarake. Sipas dëshmisë së emigrantëve, bashkë me ta në bordin e anijes së shpëtimit, kanë qenë prezentë dhe dy shtetas shqiptarë që drejtonin gomonen.
Teksa udhëtimi i tyre ka mbaruar dhe i janë afruar 100 metra bregut, dy shqiptarët që drejtonin gomonen e mbytur,kanë përdorur jelekë shpëtimi me ngjyrë portokalli dhe janë lënë të lirë. Më pas ata janë hedhur në det dhe i kanë shpëtuar arrestimit, raporton Ora News. Sapo anija e Flotës Detare është ankoruar në kalatë, nga aty kanë zbritur vetëm 55 klandestinët, por jo dy trafikantët, të cilët u larguan me anë të jelekëve të shpëtimit për t'i shpëtuar policisë. Bëhet me dije se emigrantët e që tentonin të shkonin në mënyrë të jashtëligjshme në Itali, paguanin 4000-5000 euro.