Prokuroria e Posaçme kundër Krimit dhe Korrupsionit ka kërkuar ditën e sotme 63 vite burg në total për anëtarët e grupit kriminal të ashtuquajtur Habilaj. SPAK kërkoi Moisi Habilajn, 18 vite burg, Nezar Seiti 15 vite burg, Meridian Sulaj 15 vite burg dhe Fatmir Minaj 15 vite burg. Grupi Habilaj akuzohet për trafik e kultivim narkotikësh në kuadër të grupit kriminal. Moisi Habilaj u arrestua disa vite më parë si pjesë e operacionit Venti dei Rosi të policisë italiane, por në janar të këtij viti u arrestua nga banesa ku vuante dënimin "arrest shtëpie" në Itali.
Banda e trafikantëve, e cila kishte në krye Moisi Habilajn vepronte midis Shqipërisë dhe Sicilisë për të importuar sasi të mëdha marijuane, por edhe armë lufte në ishull. Të gjitha do të kishin qenë të mundura falë një rrjeti tregtarësh me shumicë në zonë me marrëdhënie të drejtpërdrejta me klanet kryesore mafioze lokale. Ndërkohë në përgjimet e këtij grupi kriminal asokohe u përmend si i inkriminuar edhe ish-ministri i Brendshëm Sajmir Tahiri.
