JOQ Albania
App Store
SHKARKO
Home
JOQ Albania

Kardhiq-Delvinë si “pulë që pjell florinj”, përsëri miliarda shtesë për të tretën herë brenda pak ditësh
Shkruar nga: M Gjini | Publikuar më: 23/04/2021 18:46

  • Share
  • Share
  • Share
  • Share

Është me të vërtetë e pabesueshme, por duket se rruga Kardhiq-Delvinë është shndërruar vërtetë në një pulë të artë që pjell vetëm florinj. Vetëm pak ditë më parë ju treguam 2 tendera me shtesë të cilët u dhanë në një afat të afërt kohor, me pak ditë distancë njëri nga tjetri. Fillimisht ishte loti 4 i kësaj rruge ndërtuar nga firma Gjoka Konstruksion i cili rezultoi se kishte nevojë për para shtesë nga taksapaguesit shqiptarë. Bëhej fjalë për rreth 5.5 miliardë lekë të vjetra me TVSH që Ergys Verdho i ARRSH-së ia dha me bujari kësaj kompanie.

Mirëpo vetëm pak ditë më pas ishte një tjetër kompani, AGBES CONSTRUKSION, e cila kishte nevojë për para shtesë. Kësaj here bëhej fjalë për lotin 6, për të cilin Ergys Verdho i ARRSH-së dha rreth 6 miliardë lekë të tjera shtesë nëpërmjet një tenderi të ri. Mirëpo për habi, duket se tashmë i ka ardhur rradha lotit 5 që të futet në një linjë “me shokët”. Bëhet fjalë për jo pak por për rreth 4 miliardë lekë të vjetra me TVSH.

Është pikërisht ai, i zakonshmi Ergys Verdho i cili edhe këtë herë ka hapur rubinetat e parave të shtetit dhe i ka dhënë shtesë këto miliarda direkt e në xhepat e kompanisë ALB – STAR në pronësi të Sadik dhe Idajet Ismailaj. Më konkretisht bëhet fjalë për tenderin me numër reference REF-92144-04-01-2021 dhe me objekt “Ndërtim rruga Kardhiq Delvinë, Loti 5” (shtesë punimesh). Shikohet qartësisht se në vetëm pak ditë Ergys Verdho ka dhënë rreth 15.5 miliardë lekë.

Është natyrisht tepër e habitshme se si ka mundësi që tre lote në të njëjtën kohë paskan nevojë për shtesë fondesh. Mund të kuptohet pa problem që njëri nga lotet mund të dalë jashtë parashikimit dhe për të, të kërkohen para shtesë. Por që të ndodhin probleme të paparashikuara në 3 loto njëkohësisht nuk është normale. Në rastin më të mirë duhet të merren mbrapsht paratë që i janë paguar projektuesit i cili me sa duket nuk ka bërë planifikimin e duhur. Në rastin më të keq, këto para nuk nevojiten për rrugën, por thjesht për qoka fushatash.