Agron Shehaj është një nga politikanët më të pasur në Shqipëri dhe sipas deklarimeve këtë pasuri e ka siguruar përmes bizneseve në Shqipëri dhe në Itali. Ish-deputeti, i cili për zgjedhjet e 25 prillit garon në Tiranë dhe jo në Vlorë, ka deklaruar kohë më parë një apartament në Milano të Italisë, me sipërfaqe 204 m2, me vlerë plotë 1.905.000 euro.
Gjithashtu, Shehaj deklaron të drejta të arkëtueshme vetëm në shoqërinë Sestante Holding srl, me vlerë mbi 17 milionë euro. Si burim, ish-deputeti referon shitjen e aksioneve në disa kompani me vlerë mbi 11 milionë euro. Ai është një nga sipërmarrësit më të mëdhenj të call-centerave në Shqipëri, ku aktualisht punojnë shumë të rinj shqiptarë, por edhe ankesat ndaj kompanisë nuk kanë të mbaruar.
Referuar deklaratës së pasurisë së administruar nga ILDKP, Shehaj deklaron gjithashtu një kthim borxhi familjar në vlerën 340 mijë euro si dhe shlyerje të pjesshme e vlerës së kontratës së shitjes së kuotave në disa shoqëri në vlerat 1 milion euro, 65 mijë euro, 70 mijë euro, 284 mijë euro, 300 mijë euro, 400 mijë euro si dhe një detyrim ndaj shoqërisë Intercom Data Service, në vlerën 1 490 000 euro. Agron Shehaj deklaron edhe një apartament banimi në Tiranë, me sipërfaqe 106 m2, me vlerë 125 mijë euro.
