Prokuroria e Posaçme (SPAK) i është drejtuar me rekurs Gjykatës së Lartë, pas ndryshimit të masës së sigurisë për shefin e Kardiologjisë Edvin Prifti. Gjykata e Posaçme e Apelit vendosi lirimin nga qelitë e paraburgimit të kardiokirurgut Edvin Prifti dhe dhënien e masës së sigurisë ”detyrim paraqitje”, ndërkohë që mbeti në fuqi vendimi për pezullimin e tij nga detyra. Mjeku i QSUT ishte lënë në burg prej gati tre javësh pas arrestimit, pas dyshimeve për “korrupsion” dhe “pastrim parash”.
Kujtojmë se mjeku Edvin Prifti akuzohet si i përfshirë në korrupsion, pasi i kishte kërkuar para kryesekretares së Gjykatës së Krujës për të bërë operacion pa radhë nënën e saj. Mjeku ra në rrjetë rastësisht, teksa polica po përgjonte kryesekretaren Manuela Mallkuçi.Vetë Prifti i ka mohuar akuzat dhe është shprehur se paratë që i janë gjetur në banesë kanë qenë të ligjshme, dhe janë përfituar nga shitja e disa pronave nga bashkëshortja e tij.