Gjatë ditës së sotme u njoftua se drejtori i Shtëpisë së të Moshuarve në Gjirokastër Arjanit Muho dhe financierja Klodiana Qirushi janë infektuar me COVID, pak ditë pasi kanë marrë dozën e parë të vaksinës anti-COVID. Ndërkohë Arenc Brahimi, shef i NJKVSH në Gjirokastër ka deklaruar se drejtori dhe disa punonjës të tjerë në shtëpinë e të moshuarve kanë marrë vaksinën edhe pse ishin të infektuar me Covid-19. Në një intervistë për "FaxNews", Brahimi tha se punonjësit u treguan të papërgjegjshëm duke mos treguar që kishin patur kontakte me persona të infektuar me Covid-19.
Ky lajm është i vërtetë, ata gjithsej janë 5 persona të cilët janë Covid pozitiv. Ata persona nuk kanë treguar që kanë pasur shenja. Në ditën e vaksinimit ata kanë qenë në rregull. Kur u pyetën nga stafi epidemiologjik ata u treguan të papërgjegjshëm dhe nuk treguan që para 2-3 ditësh ata kishin pasur kontakte me persona të cilët kishin qenë Covid poizitv. Nga institucionet, nga shërbimi epidemiologjik është kryer vaksina, çdo gjë shkoi në rregull në moment. Pas dy ditësh ata kanë pasur një problem me temperaturën dhe pasi është kryer tamponi nga shërbimi epidemiologjik ata kanë rezultuar Covid pozitiv. Ndërkohë ata janë izoluar, gjendja e tyre është ok. Ata persona që kanë rezultuar pozitivë janë duke u kujdesur nga mjeku i familjes.
