Gjatë seancës së sotme plenare, ministri i Brendshëm Bledi Çuçi ka folur për protestat pas vrasjes së Klodian Rashës, pas një kërkese nga një grup deputetësh të opozitës parlamentare të cilët i kërkuan interpelancë kryeministrit Edi Rama. Në fjalën e tij, ministri Çuçi tha se pas vrasjes së të riut Rasha nga efektivi i forcave "Shqiponja", Tirana dhe disa qytete të tjera të vendit u përballën me tubime dhe protesta të dhunshme. Ai tha se protestuesit ishin të moshave të ndryshme duke nisur nga 12 vjeç, duke deklaruar se nuk ka pasur dhunim të të miturve.
Pas kësaj ngjarje të rëndë që shpreh keqardhjen dhe të ngushëlloj familjen Rasha, Tirana dhe shumë qytete të tjera u përballën me protesta të shumta me të rinj nga mosha 12-20 vjeç ku Tirana ishte pika kryesore. Në total gjatë protestave janë dëmtuar 46 police, në ngarkim të personave të arrestuar dhe të shoqëruar janë zbatuar të gjithë format e duhura të ligjit. Në total janë 46 punonjës policie të dëmtuar gjatë protestave, 8 policë të Drejtorisë Vendore të Policisë Tiranë, 2 të Policisë së Shkodrës dhe pjesa tjetër punonjës të FNSH. Procedime penale për tubim të paligjshëm janë 578 persona, 97 të arrestuar, të mitur nga 14-18 vjeç, 4 persona. Proceduar në gjendje të lirë 470 persona, në kërkim 8 persona. Nga mosha 14-17 janë 215 persona të proceduar. Mbi 16 vjec 5 persona. Nga personat e proceduar në gjendje të lirë dhe të shoqëruar, kishte 42 persona që akuzoheshin për shpërndarje droge mes të cilëve vetëm 14 janë shoqëruar. Hetimet në lidhje me vrasjen e Rashës janë mbyllur dhe ka prova të mjaftueshme për fajesinë e efektivit të forcave Shqiponja.
Ndërkohë kujtojmë se Klodian Rasha vetëm 25-vjeç u ekzekutua më 8 dhjetor, pranë shtëpisë së tij nga efektivi i forcave "Shqiponja", Nevaldo Hajdaraj.