Para pak ditësh u njoftua se biznesmeni italian Davide Pecorelli ishte zhdukur, ndërsa makina e tij ishte gjetur e djegur në Gjegjan të Pukës. Hetimet për zhdukjen e tij ka nisur në Shqipëri dhe në Itali dhe për këtë arsye mësohet se orët në vijim do të jenë vendimtare për zbardhjen e asaj çfarë ka ndodhur me Pecorellin. Takimet e ditës së sotme mes policisë italiane dhe asaj shqiptare pritet të përcaktojnë rezultatin e ADN-së së eshtrave të gjetura në makinën Skoda Fabia të marrë me qira nga 45-vjeçari. Sipas mediave italiane ekziston një mundësi se Pecorelli mund të jetë grabitur dhe vrarë në zonën e Gjegjanit në Pukë. Kjo për shkak të disa lëvizjeve të dyshimta në zonën e Gjegjanit. Prokuroria e Perugia-s ka hapur zyrtarisht një çështje vrasjeje, me grupin e ekspertëve – të koordinuar nga Interpol – të cilët po arrijnë në Shqipëri për të vazhduar hetimet.
