Jo vetëm bashkitë e mëdha në vend lëshojnë dorën me paratë publike, por edhe bashkitë “e vogla” nuk mbeten mbrapa. Madje me shifra vërtetë të frikshme. Rasti më i fundit ka të bëjë me Bashkinë Finiq e drejtuar nga Kristaq Kiço. Ky institucion ka organizuar një procedurë tenderi të dyshimtë me objekt “Rikonstruksion dhe zgjerim i linjës ekzistuese të ujësjellësit Krongj-Finiq, linja të reja të jashtme të fshatrave Vrion,Karahaxh, Çlirim,Bregas si dhe linja e brendshme e fshatit Çlirim,Bashkia Finiq”.
Fondi limit i këtij tenderi që mban numrin e referencës REF-81407-12-08-2020, është 250,906,055 lekë të reja pa TVSH ose rreth 3 miliardë lekë të vjetra me TVSH. Në tender kanë marrë pjesë vetëm 4 firma, ku për habi të katërta kanë ofruar thuajse të njëjtën shifër, çka përbën një dyshim të fortë se tenderi është i manipuluar.
Jo vetëm kaq, por vlera e ofruar nga fituesi, i cili është shpallur “SHANSI INVEST”, është thuajse identike me vlerën e fondit limit. Më konkretisht vlera e ofruar prej tij është 250,141,213 lekë të reja pa TVSH, ose rreth 99.69% e fondit limit. Një tjetër fakt ky që ngre dyshime të forta në lidhje me vërtetësin e tenderit. Me sa duket kryetari i bashkisë Finiq do të bëjë një dorë të mirë lekësh në kurriz të popullit që pret ujë.