Trajneri i Kukësit, Skënder Gega kthehet sot në Shqipëri. Tekniku i nënkampionëve të vendit i cili prej ditësh kishte udhëtuar drejt Turqisë, për shkak të gjendjes së rënduar nga COVID-19, ka lënë sot klinikën ku ishte shtruar pasi analizat e fundit mjekësore treguan përmirësim të ndjeshëm. Lajmi u dha nga klubi verilindor në faqen zyrtare.
57-vjeçari u kurua në Turqi për shkak të komplikemeve që i shkaktoi koronavirusi në mushkri. Falë terapive mjekësore dhe kujdesit të vazhdueshëm, ai kaloi pjesën më serioze të situatës. Tashmë, ai pritet t’i bashkohet shpejt ekipit.
Njoftimi i klubit:
Trajneri Skënder Gega ka lënë sot spitalin! Duke parë ecurinë pozitive, efektin dhe rezultatet pozitive të terapisë, doktorët kanë dalë në konkluzion dhe falë progresit pozitiv që ka qenë shumë i shpejtë duke rregulluar të gjitha parametrat, është lejuar të fluturojë drejt Tiranës. Gega mbërrin sot në Rinas në gjendje shumë të mirë shëndetësore dhe shumë shpejt do t’i bashkohet ekipit. Në emër të klubit të Kukësit e falënderojmë. Welcome back Gega!
