Teksa ditën e sotme gratë naftëtare kanë hyrë në ditën e 14 të grevës së naftëtarëve të Ballshit, gjendja e tyre shëndetësore paraqitet e rënduar jashtë mase. Mbremjen e djeshme në mbështetje të tyre janë futur në grevë edhe naftëtarët e Kuçovës. Gratë naftëtare u shprehën se po kërkojnë vetëm djersën e tyre dhe jo lëmoshë. Në formë urdhrash dhe kërkesash ato deklarojnë se duan një zgjidhje të shpejtë. Ndërsa kryeministri Edi Rama nga ana tjetër thotë se nuk mund të ketë asnje zgjidhje me presione dhe ultimatume.
Ai tha:
Të dashura greviste të Ballshit, është e drejta juaj të mos dilni nga greva, por është e pamundur të ulemi bashkë me presione e ultimatume! Jam gati të vij tek ju sapo të mbyllni grevën e të flasim si do mundemi t’ju ndihmojmë për këtë hall që nuk e ka krijuar qeveria. Ne po punojmë për të gjetur investitorë seriozë që të rindezin rafinerinë edhe pse greva juaj nuk ndihmon as për këtë! Ndërsa për ndihmën e mundshme shtetërore ndërkohë, meqë ju s’pranoni as të dilni në asistencë, ka vetëm një rrugë: Mbyllni grevën dhe ulemi qajmë hallin!