Milani po kalon një formë fantastike këtë fillim sezoni, teksa është në krye të Serie A pas katër javësh kampionat. Megjithatë, ditën e sotme, kuqezinjtë janë përballur me një lajm të keq. Lojtari më në formë i ekipit, Hakan Çalhanoglu ka pësuar një dëmtim ditën e sotme në kavilje dhe e ka pasur të pamundur të vazhdojë stërvitjen me pjesën tjetër të skuadrës.
Sipas asaj që raporton “Sky Sports”, turku është larguar nga qendra stërvitore me paterica. Futbollisti ka pasur një ndrydhje të kyçit të këmbës së majtë dhe nuk do të jetë me skuadrën e Milanit për ndeshjen e Ligës së Europës, ndaj Sëlltikut. Nuk dihet ende se sa do mungojë Çalhanoglu, por ky është një problem për Piolin, pasi lojtari po kalonte një formë të shkëlqyer dhe ishte një nga lojtarët më të mirë në serinë e rezultateve pozitive.