Se LVV do të merr më shumë apo më pak se 50% është temë që përfolet pasi ra nga pushteti Albin Kurti. Ky i fundit, prap e përsëriti në deklaratën e tij, tash me një modifikim, se do të merr mbi 50% të votave në zgjedhjet e ardhshme. Por, kësaj radhe duke e shtuar edhe emrin e Vjosa Osmanit, si partnere. Megjithatë kështu nuk mendon njohësi i çështjeve politike, Shkëlzen Maliqi. Sipas tij kjo është e pamundur.
“Është vështirë të parashikohet se sa do të rritet vota e përbashkuar e Albin Kurtit dhe Vjosa Osmanit përderisa nuk dihet ende se a do të janë në një listë të përbashkët, apo do të garojnë me dy subjekte, ndaras. Në të dy rastet nuk mund të ndodhë përmbledhje e totalit të votave që i kanë marre individualisht me 5 tetor 2019 si kryesues të listave të VV dhe të LDK, sepse një pjesë të madhe të atyre votave i kane pas falë luajalitetit të votuesve ndaj partive respektive, dhe është e paimagjinueshme që Vjosa Osmani të shkëput nga LDK-ja 180 mijë vota për t’a shtuar saldon e fitores së VV përmbi 50%. Me realist është parashikimi që Osmani t’i sjellë VV-së rreth 25 mijë vota maksimum, çka nuk ia siguron Kurtit as 40% sepse as partitë konkurente nuk do të rrinë pa kundërveprime në krijimin e koalicioneve për të rritur votën”, ka deklaruar ai.