Një aksident i rëndë u raportua dje në orët e vona të mbrëmjes në qytetin e Elbasanit. Një 55-vjeçar u përplas për vdekje nga një automjet teksa ai ishte duke kaluar rrugën.
Drejtuesi i mjetit u largua menjëherë nga vendngjarja. Së fundmi policia ka identifikuar shoferin. Mësohet se ai është një 20-vjeçar, i cili kishte marrë me qira një makinë tip “BMW”.
I riu është shpallur në kërkim.
Njoftimi i policisë:
Nga specialistët e Qarkullimit Rrugor në Drejtorinë Vendore të Policisë Elbasan, u referuan materialet në Prokurorinë pranë Gjykatës së Shkallës Parë Elbasan, dhe po punohet për kapjen e shtetasit: Sh.B., 20 vjeç, banues në Elbasan, pasi mbrëmjen e djeshme te sheshi “Gensher”, Elbasan, duke drejtuar mjetin tip BMW të marrë me qera ka aksidentuar këmbësorin shtetasin D.Gj., 57 vjeç, banues në Elbasan, i cili ka ndërruar jetë. Drejtuesi i mjetit pas aksidentit është larguar nga vendi i ngjarjes dhe vijon puna për kapjen e tij.