Në një kohë kur Agjencia e Prokurimeve Publike ka kërkuar mos-hartimin e kritereve të veçanta të cilësuara si ‘borgjeze’ në tenderat e blerjeve të automjeteve, drejtoresha Armela Krasniqi e Autoriteti i Mediave Audiovizive ka shpalosur specifikime teknike klienteliste në tenderin e fundit.
Procedura Publike e hapur ka pritur oferta nga kompanitë e makinave në Shqipëri për një mjet luksoz tip fuoristradë 4×4 për këtë institucion.
Përpos faktit se kriteret e AMA për mjetin luksoz janë të specifikuara sikur të ishin preferencë e një personi të vetëm përdorues të makinës dhe jo një institucioni që ble mjete të shtrenjta me paratë e popullit… por konsiderohen lukse të tepruara dhe harxhime të Buxhetit të Shtetit për qejfet e bordit.
Këto kritere kufizojnë pjesmarrjen e operatorëve ekonomikë dhe kanë prirje klienteliste favorizimi për një operator të caktuar që mund të përmbushë tekat e AMA.
Mjeti luksoz duhet të jetë prodhim i vitit 2021-2022, me xhama të errët pas, sedilje lëkure dhe sedilje me ngrohje para, disqe alumini dhe shina në tavan ngjyrë gri.
37 MLN Lekë pa TVSH i janë dhënë Gentian Bushatit të Porsche Albania, si sponsori i AMA-s në këtë tender. Oligarku i makinave në vend do të sigurojë mjetin luksoz për drejtoreshën e AMA, si pjesëmarrës i vetëm në garë.
Rikujtojmë se 6 anëtarët e Bordit të AMA u zgjodhën nga PD dhe PS dhe u votuan nga Kuvendi me dyer të mbyllura.
Anëtarët e rinj të bordit të AMA-s janë Aurela Bicja, Besjan Zogaj, Desada Metaj, Gjergj Hamiti, Jetmir Halilaj dhe Joana Allushi.
Besjan Zogaj është djali i analistit Preç Zogaj, i cili ka kaluar në krah të Bashës pas përçarjes së PD, kur kryedemokrati shpalli ‘non grata’ Berishën.
Desada Metaj është këshilltare e Bashës në PD e cila u zotua të merrte postin e shefes së zyrës së komunikimit para zgjedhjeve të 25 Prillit.
Jetmir Halilaj është i pozicionuar pranë Irfan Hysenbelliut me rol kryeredaktor i gazetës Panorama Sport. Linja redaksionale e grupit mediatik të Hysenbelliut është bërë e qartë që para se të zbulohej se Basha takonte Ballën dhe Veliajn në resortet e tij.
Nuk dihet se kush prej tyre do e përdorë i pari makinën luksozë të blerë me paratë e popullit.
Ky institucion ka nxjerr në ankand njërën prej makinave të vjetra dhe e ka shitur për 1.5 Milionë Lekë të vjetra.